رباعيات صلاح جاهين ...

رباعيات صلاح جاهين

مع إن كل الخلق من أصل طين

وكلهم بينزلوا مْغَمَّضين

بعد الدقايق والشهور والسنين

تلاقي ناس أشرار وناس طيبين

عجبي !!

عجبي عليك.. عجبي عليك يا زمن

يا بو البِدَع يا مبكيِّ عيني دَمًا

إزاي أنا اختار لروحي طريق

وأنا اللي داخل في الحياة مرغمًا

عجبي !!

مرغم عليك يا صُبح مغصوب يا ليل

لادخلتها برِجْليَّا ولا كانلي ميل

شايّلني شيّل دخلت انا في الحياة

وبكره ح اخراج منها شايّلني شيل

عجبي !!

سنوات وفايته عليّا فوج بعد فوج

واحدة خَدِتني ابن والتانية زوج

والتالتة أب خدتني والرابعة إيه

إيه يعمل الِّي بيحْدفُه موج لموج ؟

عجبي !!

وأنا في الظلام.. من غير شعاع يهتكه

أقف مكاني بخوف ولا أتركه

ولما بيجي النور واشوف الدروب

أحتار زيادة.. أيهم أسْلكه؟

عجبي !!

نظرت في الملكوت كتير وانشغلت

وبكل كِلمةْ (ليه؟) و (عشانيه) سألت

أسأل سؤال.. الرد يرجع سؤال

واخرج وحيرتي أشد مما دخلت

عجبي !!

خرج ابن آدم م العَدَمْ قلت : ياه

رج ابن آدم للعدم قلت : ياه

تراب بيحيا.. وحيّْ بيصير تراب

الأصل هوَّ الموت والا الحياة ؟

عجبي !!

ضريح رخام فيه السعيد اندفن

وحُفره فيها شريد من غير كفن

مرِّيت عليهم.. قلت يا للعجب

لاتنين ريحتهم فيها نفس العَفَن

عجبي !!

ياما صادفت صحاب وما صَحِبْتهمش

وكاسات خمور وشراب وما شربتهمشْ

أندم على الفرص اللي أنا سبتهم

والا على الفرص اللي ماسبتهمش ؟

عجبي !!

والكون ده كيف موجود من غير حدود ؟

وفيه عقارب ليه وتعابين ودود ؟

عاِلم مجرب فات وقال سلامات

ده ياما فيه سؤالات من غير ردود

عجبي !!

غدْر الزمان يا قلبي مالهوش أمان

وحايبجي يوم تحتاج لحبة إيمان

قلبي ارتجف وسأَلني.. أَأَمِنْ بإيه ؟

أَأَمن بإيه محتار بقالي زمان ؟

عجبي !!

يا باب أيا مقفول.. إمتى الدخول ؟

صبرت ياما واللي يصبر ينول

دقيت سنين.. والرد يرجع لي : مينْ ؟

لو كنت عارف مين أنا.. كنت أقول

عجبي !!

أنا شاب لكن عمري ولا ألف عام

وحيد ولكن بين ضلوعي زحام

خايف ولكن خوفي مني أنا

أخرس ولكن قلبي مليان كلام

عجبي !!

أحب أعيش ولو أعيش في الغابات

أصحى كما ولدتني أمي وابات

طائر.. حُوان.. حشرة.. بشر.. بس اعيش

محلا الحياة.. حتى في هيئة نبات

عجبي !!

سَهِّير ليالي وياما لفِّيت وطُفت

ف ليله راجع على الظلام قمت شفت

الخوف.. كأنه كلب سدّ الطريق

وكنت عاوز أقتله.. بس خُفت

عجبي !!

كان فيه زمان سحلية طول فَرْسَخين

كهفين عيونها وخَشْمَها بَرْبخين

ماتت.. لكن الرعب لم عمره مات

مع إنه فات بدل التاريخ تاريخين

عجبي !!

عجَبتني كلمة من كلام الوَرَقْ

النور شَرَق من بين حروفها وبَرَقْ

حبّيت أشيلها ف قلبي.. قالت حرام

ده أنا كل قلب دخلت فيه اتحرَق

عجبي !!

رقبة قزازه وقلبي فيها انحشر

شربت كاس واتنين وخامس عشر

صاحبت ناس من الخمرة ترجع وحوش

وصاحبت ناس م الخمرة ترجع بَشر

عجبي !!

كل اللي في الخمّارة صابهم جنون

صبحوا الرجال يتبادلوا كاس المنون

وبْدمّ ونبيت انكتب ع الجدار

"يا ميت ندامة ع اللي قلبه حنون"

عجبي !!

قالوا الشقيق بِيمُصّ دم الشقيق

والناس ما هيَّاش ناس بحق وحقيق

قلبي رميته وجبت غيره حجر

داب الحجر... ورجعت قلبي رَقيق

عجبي !!

يوم قلت آه.. سمعوني قالوا فَسَدْ

ده كان جدع قلبه حديد واتحسد

رديت على اللايمين أنا وقلت.. آه

لو تعرفوا معنى زئير الأسد

عجبي !!

بين موت وموت.. بين النيران والنيران

ع الحبل ماشيين الشجاع والجبان

عجبي عَلادي حياة.. ويا للعجب

إزاي أنا – ياتخين – بقيت بهلوان

عجبي !!

أنا قلبي كان شخشيخة أصبح جَرس

جلجلت به صِحيُوا الخدم والحرس

أنا المهرج.. قمتو ليه خفتو ليه ؟

لافْ إيدي سيف ولا تحت مني فرس

عجبي !!

دخل الربيع يضحك لقاني حزين

نده الربيع على اسمي لم قلت مين

حط الربيع أزهاره جنبي وراح

وإيش تعمل الأزهار للمَيتين

عجبي !!

مهبوش بخربوش الألم والضياع

قلبي ومنزوع م الضلوع انتزاع

يا مرايتي يا اللي بترسمي ضحكتي

يا هَلتٍٍرى ده وش والا قناع

عجبي !!

حبّيت.. لكن حب من غير حنان

وصاحبت لكن صُحبة مالهاش أمان

رحت لحكيم واكتر لقيت بلوتي

إن اللي جوّه القلب مش ع اللسان

عجبي !!

ليه يا حبيبتي ما بيننا دايمًا سفر

ده البعد ذنب كبير لا يُغتفر

ليه يا حبيبتي ما بيننا دايمًا بحور

أعدي بحر الاقي غيره اتحفر

عجبي !!

ورا كل شباك ألف عين مفتوحة

وانا وانتي ماشيين يا غرامي الحزين

لو التصقنا نموت بضربة حجر

ولو افترقنا نموت مِتحسَّرين

عجبي !!

نوح راح لحاله والطوفان استمر

مركبنا تايهة لسة مش لاقية بَر

آه من الطوفان وآهين يا بر الأمان

إزاي تبان والدنيا غرقانة شر

عجبي !!

على رجلي دم.. نظرت له ما احتملت

على إيدي دم.. سألت : ليه ؟ لم وصلت

على كتفي دم وحتى على راسي دم

أنا كُلِّي دم.. قلت ؟.. والا اتقلت ؟

عجبي !!

أنا كل يوم اسمع.. فلان عذِّبوه

أسرح في بغداد والجزائر واتوه

ما اعجبش م اللي يطيق بجسْمه العذاب

واعجب من اللي يطيق يعذب أخوه

عجبي !!

ينبوع وفي الحواديت أنا سمعت عنه

إنه عجيب.. وف وسط لهاليب لكنُّه

شقِّيت كما الفرسان طريقي.. لقيت

حتى الخنازير والكلاب شربوا منُّه

عجبي !!

يا قرص شمس مالهش قبة سما

يا ورد من غير أرض شبّ ونما

يا أي معنى جميل سمعنا عليه

الخلق ليه عايشين حياة مؤلمة ؟

عجبي !!

شاف الطبيب جرحي وَصَف له الأمل

وعطاني منه مقام يا دوب ما اندمل

مجروح جديد يا طبيب وجرحي لهيب

ودواك فرغ مني.. وإيه العمل ؟

عجبي !!

أعرف عيون هي الجمال والحسن

واعرف عيون تاخد القلوب بالحضن

وعيون مُخيفة وقاسية وعيون كتير

وباحس فيهم كلهم بالحزن

عجبي !!

إيش تطلبي يا نفسي فوق كلّ ده ؟

حظك بيضحك وانتي متنكدة

ردت قالت لي النفس : قول للبشر

ما يبصوليش بعيون حزينة كده

عجبي !!

اقلع غماك يا تور وارفض تِلِفْ

اكسر تروس الساقية واشتم وتِف

قال : بس خطوة كمان.. وخطوة كمان..

يا اوصل نهاية السكة يا البير يجّف

عجبي !!

يا حزين يا قمقم تحت بحر الضياع

حزين أنا زيك وإيه مستطاع ؟!

الحزن ما بقالهوش جلال يا جدع

الحزن زي البرد.. زي الصداع

عجبي !!

في يوم صحِيت شاعر براحة وصفا

الهم زال والحزن راح واختفى

خَدني العجب وسألت روحي سؤال

أنا مُت ؟.. والا وصلت للفلسفة ؟

عجبي !!

الفيلسوف قاعد يفكر سِيبوه

لا تعملوه سلطان ولا تصلبوه

ما تعرفوش إن الفلاسفة يا هوه

اللي يقولوه بيرجعوا يكدّبوه ؟

عجبي !!

على بعد مليون ميل من أرضنا

من الفراغ الكوني بصيت أنا

لا شفت فرق ما بين جبال أو بحور

ولا شفت فرق ما بين عذاب أو هَنا

عجبي !!

إنسان أيا إنسان ما أجهلك ؟

ما أتفهك في الكون وما أضألك ؟

شمس وقمر وسدوم وملايين نجوم

وفاكرها يا موهوم مخلوقه لك ؟

عجبي !!

نظرت فوقي للنجوم وانا ساير

رجليا عَترت في الحُفَر والحجاير

بقيت أقول وانا ع التراب : يا سلام

مش بس عِبره أخذت لكن عباير

عجبي !!

-يا نجم.. نورك ليه كده بيرتجف ؟

هوّ انت قنديل زيت ؟.. أو تختلف ؟

-أنا نجم عالي.. بس عالي قوي

وكل ما انظر تحت أخاف انحدف

عجبي !!

السم لو كان في الدوا.. منين يضر ؟

والموت.. ولو لعدوّنا.. منين يُسرّ ؟

حُط القلم في الحبر واكتب كمان

.. والعبد للشهوات.. منين هو حُرّ ؟

عجبي !!

وقفت بين شطين على قنطرة

الكدب فين والصدق فين يا ترى

محتار ح اموت.. الحوت خرج لي وقال

هو الكلام يتقاس بالمسطره ؟

عجبي !!

سرداب في مستشفى الولاده طويل

صرخات عذاب ورا كل باب وعويل

.. وفي الطريق متزوقين البنات

متزوقين للحب والمواويل

عجبي !!

الدنيا أُوده كبيره للانتظار

فيها ابن آدم زيُّه زي الحمار

الهم واحد.. والمَلَلْ مشترك

ومفيش حمار بيحاول الانتحار

عجبي !!

أيوب رماه البين بكل العلل

سبع سنين مرضان وعنده شلل

الصبر طيب.. صبر أيوب شفاه

بس الأكاده مات بفعل المَلَل

عجبي !!

نسمة ربيع لكن بتكوي الوشوش

طيور جميلة بس من غير عشوش

قلوب بتخفق.. إنما وحدها

هي الحياه كده.. كلها في الفاشوش

عجبي !!

يا طير يا عالي في السماء طُظ فيك

ما تفتكرشي ربنا مُصطَفيك

برضك بتاكل دود وللطين تعود

تمص فيه يا حلو.. ويمص فيك

عجبي !!

كروان جريح مضروب شعاع م القمر

سقط من السموات فؤاده انكسر

جِريِتْ عليه قطه عشان تبلعه

أَتاريه خيال شعراء ومالهوش أثر

عجبي !!

ياللي نصحت الناس بشرب النبيت

مع بنت حلوه.. وعود، وضحك، وحديت

مش كنت تنصحهم منين يكسبوا

تَمن ده كله ؟.. والا يمكن نسيت

عجبي !!

ما حد في الدنيا دي واخد جزاته

ولا حد بيفكر في غير لذاذاته

ماتعرفيش يا حبيبتي.. أنا وانتي مين ؟

انتي عروس النيل.. وأنا النيل بذاته

عجبي !!

رقاصه خرسا ورقصه من غير نغم

دنيا.. يا مين يصالحها قبل الندم

ساعْتِن تهز بوجهها يعني لا

يترجرجوا نهديها يعني نعم

عجبي !!

اخطفني ياللي تحبني ع الحصان

الدنيا قالت يوم في ماض الزمان

اخطفني ياللي تحبني ع الفرس

الدنيا قالت.. قام خطفها الشيطان

عجبي !!

من بين شقوق الشيش وشقشقْت لك

مع شهقة العصافير وزقزقْت لك

نهار جديد أنا.. قوم نشوف نعمليه

أنا قلت يا ح تقتلني.. يا ح اقتلك

عجبي !!

قلبي عليل يا ناس وفي الكاس دواه

مدِّيت له إيدي شرِبت م اللي حَواه

جنبي الشمال خف.. اليمين اتوجع

وإيه يداوي الكِبْد م اللي كواه

عجبي !!

.. دي مذكرات وكتبتها من سنين

في نوته زرقا لون بحور الحنين

عترْت فيها.. رميتها في المهملات

وقلت أما صحيح كلام مخبولين

عجبي !!

دخل الشتا وقَفَل البيبان ع البيوت

وجعل شعاع الشمس خيط عنكبوت

وحاجات كتير بتموت في ليل الشتا

لكن حاجات أكتر بترفض تموت

عجبي !!

- الدنيا من غير الربيع ميّته

ورقة شجر ضعفانه ومفتفته

- لأ يا جدع غلطان تأمّل وشوف

زهر الشتا طالع في عز الشتا

عجبي !!

يا للي انت بيتك قش مفروش بريش

تقوى عليه الريح.. يصبح مفيش

عجبي عليك حواليك مخالب كبار

ومالكش غير منقار وقادر تعيش

عجبي !!

سمعت نقطة مَيّه جُوّه المحيط

بتقول لنقطه ماتنزليش في الغويط

أخاف عليكي م الغرق.. قلت أنا

ده اللي يخاف م الودع يبقى عبيط

عجبي !!

جالك أوان ووقفت موقف وجود

يا تجود بِدَه يا قلبي يا بْده تجود

ما حد يقدر يبقى على كل شيء

مع إن – عجبي – كل شيء موجود

عجبي !!

جالك أوان وعرفت مشي الجنايز

كيف شُفتها يا عبد رب اللذايذ

قال : شفت شيل بالحيل فقير أو أمير

كما شالوا في الخمامير فواضي القزايز

عجبي !!

أنا كنت شيء وصبحت شيء ثم شيء

شوف ربنا.. قادر على كل شيء

هَزِّ الشجر شواشيه ووشوشني قال :

لابد ما يموت شيء عشان يحيا شيء

عجبي !!

يا مشرط الجرّاح أمانة عليك

وانت فْ حشايا تبص من حواليك

فيه نقطه سوده في قلبي بدأت تبان

شيلها كمان.. والفضل يرجع إليك

عجبي !!

كيف شفت قلبي والنبي يا طبيب

هَمَد ومات والا سامع له دبيب

قاللي ؟ لقيته مختنق بالدموع

وما لوش دوا غير لمسه من إيد حبيب

عجبي !!

تسلم يا غصن الخوخ يا عود الحطب

بيجي الربيع.. تطلع زهورك عجب

وانا ليه بيمضي ربيع وبيجي ربيع

ولسه برضك قلبي حتة خشب

عجبي !!

بحر الحياه مليان بغرقى الحياه

صَرَخْت خَش الموج في حلقي ملاه

قارب نجاه !.. صَرَخْت قالوا مفيش

غير بس هو الحُب قارب نجاه

عجبي !!

فارس وحيد جوَّه الدروع والحديد

رفرف عليه عصفور وقال له نشيد

منين منين.. ولفين لفين يا جدع ؟

قال من بعيد ولسه رايح بعيد

عجبي !!

كان في قمر كأنه فرخ الحمام

على صغره دق شعاع شق الغمام

أنا كنت حاضر قلت له ينصرك

إشحال لما ح تبقى بدر التمام

عجبي !!

النهد زي الفهد نط اندلع

قلبي انهبش بين الضلوع وانخلع

ياللي نهيت البنت عن فعلها

قول للطبيعة كمان تبطل دلع

عجبي !!

صوتك يا بنت الإيه كأنه بدن

يرقص يزيح الهم يمحي الشجن

يا حلوتي وبدنك كأنه كلام

كلام فلاسفه سكروا نسيوا الزمن

عجبي !!

كرباج سعاده وقلبي منه انجلد

رَمَح كأنه حصان ولَفّ البلد

ورجع لي نُصِّ الليل وسألني.. ليه

خجلان تقول إنك سعيد يا ولد

عجبي !!

مزِّيكه هاديه الكون فيها انغمر

وصيف وليل وعُقد فل وسَمَرْ

يا هَلْتري الناس كلهم مبسوطين ؟

ويا هَلْتري شايفين جمال القمر ؟

عجبي !!

إنشد يا قلبي غنوتك للجمال

وارقص في صدري من اليمين للشمال

ما هوش بعيد تفضل لبكره سعيد

ده كل يوم فيه ألف ألف احتمال

عجبي !!

آه لو أنا ومحبوبي جُزنا الفضا

في سفينة وحدينا.. وأشيا رضا

ساعة صفا تعجبنا نرجع لها

والهم قبل ما بيجي.. يبقى مضى

عجبي !!

أنا إله الوجد رب الهيام

أضرب بسهم الوهم وَهْم الغرام

وَهْم الغرام من كُتْر ما هو لذيذ

رَشَقْت أنا ف صدري جميع السهام

عجبي !!

حدوته عن جعران وعن خُنفسه

اتقابلوا حَبُّوا بعض ساعة مِسَا

ولا قال لهم حد اختشوا عيب حرام

ولا حد قال دي علاقة متدنسه

عجبي !!

ياللي عرفت الحب يوم وانطوى

حِسَّك تقول مشتاق لنبع الهوى

حِسّك تقول مشتاق لنبع الغرام

ده الحب.. مين داق منه قطره.. ارتوى

عجبي !!

زحام وأبواق سيارات مزعجة

اللي يطول له رصيف.. يبقى نجا

لو كنت جنبي يا حبيبي أنا

مش كنت اشوف إن الحياة مُبهجة ؟

عجبي !!

إيديا في جيوبي وقلبي طِرِب

سارح في غربة بس مش مِغترِب

وحدي لكين وَنْسان وماشي كده

وبابتعد.. ما اعرفش.. أو باقترب

عجبي !!

يا ميت ندامه ع القلوب الخلا

لا محبة فيها ولا كراهه ولا

حتى يا قلبي الحزن ما عادش فيك

معلهش... لك يوم برضه راح تتملا

عجبي !!

مرحبْ ربيع مرحب ربيع مرحبهْ

يا طفل يا للي ف دمي ناغا وْحَبَا

علشان عيونك يا صغَّنن هويت

حتى ديدان الأرض والأغربه

عجبي !!

فتحت شباكي لشمس الصباح

ما دخلش منه غير عويل الرياح

وفتحت قلبي عشان أبوح بالألم

ما خرجش منه. غير محبه وسماح

عجبي !!

غمست سنبك في السواد يا قلم

علشان ما تكتب شعر يقطر ألم

مالك جرالك إيه يا مجنون... وليه

رسمت وردة وبيت وقلب وعَلَم

عجبي !!

أنا الذي عمري اشتياق في اشتياق

وقطْر داخل في محطة فراق

قصدت نبع السم وشربت سم

من كُتْر شوقي وعشمي في الترياق

عجبي !!

أنا الذي عشت الزمن مَضْيَعة

بروح حزينة معفِّنة مضعضعه

زرعت شجرة سنط لجل انجرح

لقيتها شَعر البنت ومفرَعة

عجبي !!

لو فيه سلام في الأرض وطمان وأمن

لو كان مفيش ولا فقر ولا خوف وجبن

لو يملك الإنسان مصير كل شيء

أنا كنت أجيب للدنيا ميت ألف ابن

عجبي !!

العُشب طاطا للنسايم ونخَّ

أخضر طري مالهش في الحُسن أخ

عصفور عبيط أنا.. غاوي بهجة وغنا

ح انزل هنا.. وانشا لله يهبرني فخ

عجبي !!

أوصيك يا ابني بالقمر والزهور

أوصيك بليل القاهرة والمسحور

إن جيت في بالك.. اشتري عُقد فُل

لأي سمرا... وقبري إوعك تزور

عجبي !!

غمض عينيك وارقص بخفة ولع

الدنيا هيّ الشابة وانت الجدع

تشوف رشاقة خطوتك تعبدك

لكن انت لو بصيت لرجليك.. تقع

عجبي !!

حاسب من الأحزان وحاسب لها

حاسب على رقابيك من حبلها

راح تنتهي ولابد راح تنتهي

مش انتهت أحزان من قبلها ؟

عجبي !!

يأسك وصبرك بين إيديك وانت حر

تيأس ما تيأس الحياه راح تُمر

أنا دقت مِنْدا ومِنْدا عجبي لقيت

الصبر مُرّ وبرضك اليأس مُرّ

عجبي !!

ولدي نصحتك لما صوتي اتنَبَح

ما تخافش من جِنِّي ولا من شَبَح

وإن هبّ فيك عفريت قتيل اسأله

ما دافعش ليه عن نفسه يوم ما اندبح ؟

عجبي !!

ولدي إليك بدل البالون ميت بالون

انفخ وطرقع فيه على كل لون

عساك تشوف بعينيك مصير الرجال

المنفوخين في السترة والبنطلون

عجبي !!

خُوض معركتها زي جدّك ما خاض

صالب وقالب شفتك بامتعاض

هيّ كده.. ما تنولش منها الأمل

غير بعد صَدّ وَردّ ووجاع مخاض

عجبي !!

كام اشتغلت يا نيل في نحت الصخور

مليون بئونه وألف مليون هاتور

يا نيل أنا ابن حلال ومن خلفتك

وليه صعيبه عليّ بس الأمور

عجبي !!

منين أجيبها كلمة متألمة

لِعَبيّة فايره حايره ومصممة

منين أجيب كلمة تكون بنت أرض

تشفي اللي ما شفاهوش كلام السما ؟

عجبي !!

أنا قلت كلمة وكان لها معينين

كما بطن واحده وتوءمين زين وشين

لو دنيا شر.. التوءم الخير يموت

لو دنيا خير.. الشرح يعيش منين ؟

عجبي !!

برّه القزاز كان غيم وأمطار وبرق

ما يهمنيش – أنا قلت – ولا عندي فرق

غيّرت رأيي بعد ساعة زمان

وكنت في الشارع... وفي الجزمة خرق

عجبي !!

عيني رأت مولود على كتف أُمه

يصرُخ تهنِّن فيه يصرخ تضمُّه

يصرخ تقول : يا بني ما تنطق كلام

ده اللي ما يتكلمش يا كُتْر همُّه

عجبي !!

يا عندليب ماتخافش من غنوتك

قول شكوتك واحكي على بلوتك

الغنوه مش ح تموِّتك إنما

كتم الغنا هو اللي ح يموتك

عجبي !!

يا للي بتبحث عن إله تعبده

بحث الغريق عن أي شيء ينجده

الله جميل وعليم ورحمن رحيم

احمل صفاته... وانت راح توجده

عجبي !!

حقرا وفوق كوكب حقير محتقر

في الكون تكون دنياكو إيه يا بَقَر

رملايه من صحرا ؟.. لكين إيش تقول

والكون بحاله جوّه عقل البشر

عجبي !!

لا تجبر الإنسان ولا تخيره

يكفيه ما فيه من عقل بيحيَّره

اللي النهارده بيطلبه ويشتهيه

هو اللي بكره ح يشتهي يغيّره

عجبي !!

يا للي ف حماه الشمس تلقي الملاذ

وألف بكره وبكره.. وفي ضلوعه لاذ

مين انت ؟ مارد ؟ رب ؟ قال لأ ده بس

انا اللي باروي القمح واسقي الفولاذ

عجبي !!

غَسَل المسيح قدمك يا حافي القدم

طوبى لمن كانوا عشانك خَدَم

صنعت لك نعليك أنا يا أخي

مستني إيه.. ما تقوم تدوس العَدَم

عجبي !!

البط شال عدَّى الجبال والبحور

ياما نفسي اهجّ... أحج ويا الطيور

أوْصيك يا ربي لما أموت.. والنبي

ما تودّنيش الجنة... للجنة سور

عجبي !!

طال انتظاري للربيع يرجع

والجو يدفا والزهور تطلع

عاد الربيع عارم عرمرم شباب

إيه اللي خلاني ابتديت افزع ؟

عجبي !!

ولو انضنيت وفنيت وعمري انفرط

مش عاوز الجأ للحلول الوسط

وكمان شطط وجنون مانيش عاوز

يامين يقول لي الصح فين والغلط ؟

عجبي !!

عاد الربيع كأنه طعم الحب

والحب نار جوه العروق بتصب

اتمتع ازاي بيه وأنا متقطع

من كُتْر خوفي لا في الخطيئة يطب ؟

عجبي !!

ازاي شبابنا يقوم وياخد دوره

من غير صراخ يئذيه ويجرح زوره

يا هلَْتَري أحسن له يقعد ساكت ؟

أو ينترك ولو خرج عن طوره؟

عجبي !!

عيني رأت عصفور ووياه ابنه

بيحدفه في الريح وياخده ف حضنه

نوبتين وتالت نوبه – عجبي عليهم -

كانوا سوا بيرفرفوا ويغنوا

عجبي !!

أحسن ما فيها العشق والمعشقة

وشويتين الضحك والتريقة

شفت الحياة، لفيت، لقيت الألذ

تغييرها، وده يعني التعب والشقا

عجبي !!

عجبي على العجب العجيب العجاب

لما الحقيقة تطل بعد احتجاب

وتروق وتحلا وفجأة تصبح مفيش

كمثل طراطيش بحر ياما خد وجاب

عجبي !!

في الهوّ ماشي يا بهلوان إش إش

يا فراشة منقوشة على كل وش

شقلبت عقلي وعقلي شقلبني

وكنت باحسبني بقيت ما اندهشّ

عجبي !!

وقفت ساعة الصبح باغسل سناني

قالت لي شايف قوتي ولمعاني ؟

إيش تطلب اليوم مني ضحكة أسد ؟

والا ابتسامة إعلانات أمريكاني ؟

عجبي !!

الحلو يمّ اليمّ صابح رايح

سارح في حضن الميه سابح سايح

الحلو داب في البحر. قلت ادوقه

وجدت لسه البحر برضك مالح

عجبي !!

يا كل كلمة للعجب في قاموس

انسكلوبيديا لسان عرب أو لاروس

تعالوا نجدة. ده لسه في عصرنا

الشمس والبحر العريض بالفلوس

عجبي !!

الموج تلول تهبط وتطلع تلول

يا بحر خدني الشط صاحبك ملول

والا بلاش الشط ح اعمل به إيه

ده ريحته طحلب مهري وام الخلول

عجبي !!

عيني رأت مخلوق في غاية البشاعة

أنا قلت له لما تأملته ساعة :

اللذة والموت علموك اللََّزج

وأنا علموني الفلسفة والشجاعة

عجبي !!

غطس وقب الموج نهود بمبي

من ألف جيل جمالات ما تعلم بي

يا قلبي عيب دول أمهاتنا القدام

استغفر الله العظيم ربي

عجبي !!

علقت في المسمار قناع مهزلة

ومعاه قناع مسأساة بحزنه ابتلا

بصِّيت لقيتهم يشبهوا بعضهم

واهو ده العجب يا ولاد.. وإلا فلا

عجبي !!

ظهر المسيح الحي على سفح ربوة

ونزل بهالة الضيّ وقعد في قهوة

بُصُوا. تعالوا. قالوا ؟ خليه في حاله

الناس في حالهم يا بني. مالهمش دعوة

عجبي !!

لولا اختلاف الرأي يا محترم

لولا الزَلَطتين ما لوقود انضرم

ولولا فرعين ليف سوا مخاليف

كان بيننا حَبْل الود كيف اتبرم ؟

عجبي !!

يا وردة قلبي معاكي في الريح لعب

لا تعبْتِي م الريح ولا قلبي تعب

احنا كده : نرتاح في صخب الجنون

وفي السكون بنخاف قوي ونتْرعب

عجبي !!

ما آنتاش بتلعب ليه يا روح بابا ؟

ولاّ عسكري ولاّ لص في عصابة ؟

إلعب أسد أو ديب رهيب أو غزال

دي الدنيا في نهاية المطاف غابة

عجبي !!

ورد في ورق سلوفان يا حلوة أهديلك ؟

والا انقله بالطين في شتلة واجيلك ؟

الأولاني لو وحا بحناني

عجبي على التاني بإيه يوحيلك ؟

عجبي !!

أنا قلبي كوكب وانطلق في المدار

حواليكي يا محبوبتي يا نور ونار

يلف مهما يلف مابيكتفيش

وِتملّلي نصه ليل ونصه نهار

عجبي !!

الأرض شوك أيوه لكين هايش

والحُمرة مش يعني الطريق حايش

دي منا السيال. وبُشرة خير

إن انتي عايشة. وإن أنا عايش

عجبي !!

إيه اللي خدته من مرور السنين

يا قلبي إلا دمعتك والأنين

بتئن وبتفرح وترجع تحن

مع إن مش كل البشر فرحانين

عجبي !!

أوقات افوق ويحل عني غبايا

واشعر كأني فهمت كل الخبايا

وافتح شفايفي عشان أقول الدرر

ما أقولش غير حبة غزل في الصبايا

عجبي !!

مركب ورق من نفخة تتطوَّح

ركبتها والكل بيلوَّح

سوّحت فيها اتنين وخمسين سنة

للآن. ولا بتغرق ولا تروَّح

عجبي !!

ع الجسر فُتّ الصبح تحت الضباب

بين اللي لسه بينغرس واللي طاب

ما اهتز قلبي لنبت طالع جديد

قد اللي ماشي. وتحت باطه الكتاب

عجبي !!

يا خالق الكون بالحساب والجبر

وخالقني ماشي بلختيار والجبر

كل اللي حيلتي زمزمية أمل

وازاي تكفيني لباب القبر ؟

عجبي !!

قاعدة قناني الخمر ساكتة وساهية

مع ابن آدم في الشبه مُتناهية

مفيش كده رَوَقان في لحظه تشوفهم

وبعدها بلحظه يودوا ف داهية

عجبي !!

حتة محارة وجدتها في يوم لقيةّ

قالت لي شوف كيف الطبيعة شقية ؟

نظرت للكهف اللي فيها ولقيت

إن الطبيعة كمان.. لا أخلاقية

عجبي !!

بلياتشو قال إيه بس فايدة  فنُوني ؟

وتلات وقق مساحيق بيلونوني

والطبل والزمامير وكتر الجعير

إذا كان جنون زبوني زاد عن جنوني

عجبي !!

نقطة مرارة كمان على مشروبي

ذوبها يا ساقي حسب مطلوبي

طعم الحياة. مش برضه فيها وفيها ؟

ليالي وردي ونهارات خرّوبي ؟

عجبي !!

وسط الحطام اتفرجوا يا أنام

تمثال ملك. ومبولة م الرخام

لتنين نحتهم نفس أسطى الحجر

وكانوا ذات يوم كتلتين لسه خام

عجبي !!

عيد. والعيال اتنططوا ع القبور

لعبوا استغامية. ولعبوا بابور

وباللونات. ونايلونات شفتشي

والحزن ح يروح فين جنب السرور

عجبي !!

أنا قلبي كورة.. والفراودة أكم

ياما اتنطح وانشاط.. وياما اتعكم

واقول له كله ح ينتهي في المعاد

يقول بساعتك ؟ والا ساعة الحكم ؟

عجبي !!

الضحك قال يا سم ع التكشير

أمشير وطوبة وانا ربيعي بشير

مطرح ما باظهر بانتصر ع العدم

انشالله أكون رسماية بالطباشير

عجبي !!

أهوى الهوى وهمس الهوى في العيون

وبسمة المغرم. ودمعه الحنون

وزلزلات الحب نهد الصبا

أكون أنا المحبوب. أو لا أكون

عجبي !!

يا ملونين البيض في شم النسيم

لون الحنين والشوق وخمر النديم

ماتعرفوش سايق عليكو النبي

تلونوا الأيام بلون النعيم ؟

عجبي !!

الدنيا صندوق دنيا. دور بعد دور

الدكة هيَّ. وهيَّ كل الديكور

يمشي اللي شاف. ويسيب لغيره مكان

كان عربجي أو كان امبراطور

عجبي !!

قطي العزيز راقد على الكنبات

في نوم لذيذ.. وبيلحس الشنبات

وأنا كل عين فنجان مدلدق قلق

صدق اللي قال إن الحياة منابات

عجبي !!

قالوا السياسة مهلكة بكل عام

وبحورها يا بني خشنة مش ريش نعام

غوص فيها تلقى الغرقانين كلهم

شايلين غنايم. والخفيف اللي عام

عجبي !!

سلام سلام.. سلام سلام.. سلام

كلام كلام.. كلام كلام.. كلام

هز الورق يا صاحبي كِدَهوّه

يطلع كلام سلام. وسلام كلام

عجبي !!

فوق تحت. ورا قدام. يمين شمال

في الجوّ. تحت المية. أو في الرمال

طَلَب الكمال يحرم على الممكن

والممكنات دول محرومين م الكمال

عجبي !!

هات يا زمان. وهات كمان يا زمان

غير بسمة الشجعان ما مني يبان

هو اللي داق الفرحة يوم ثورته

يقدر يعود ولا ثانية للأحزان ؟

عجبي !!

عبثًا باقول واقرا في سورة عبس

ماتلومش حد إن ابتسم أو عبس

فيه ناس تقول الهزل يطلع جد

وناس تقول الجد يطلع عبث

عجبي !!

يومي على الله تنتهي وتغيب

الشمس. وتعود تاني يوم لهاليب

زي الحياة. مأساة. ومن كترها

بقى لا انتهاءها وابتداءها عجيب

عجبي !!

علم الَلَوع أضخم كتاب في الأرض

بس اللي يغلط فيه يجيبه الأرض

أما الصراحة فأمرها ساهل

لكن لا تجلب مال ولا تصون عرض

عجبي !!

أنا كانلي أب. وكان رئيس محكمة

ستين سنة. في قضية واحدة اترمى

ستين سنة وطلع براءة وخرج

يشكي الحياة والموت لرب السما

عجبي !!

قالوا ابن آدم روح وبدنه كفن

قالوا لأ بدن. قالوا لأ ده روح في بدن

رفرف فؤادي مع الرايات في الهوا

أنا قلت : لأ . روح في بدن في وطن

عجبي !!