دور يا كلام - أحمد فؤاد نجم
دور يا كلام على كيفك دور
خلي بلدنا
إرمي الكلمة في بطن الضلمه
تحبل سلمى
وتولد نور
يكشف عيبنا
ويلهلبنا
لسعة ف لسعه
نهب نثور
دور يا كلام
على كيفك دور
***
عم إمام
عنده كلام
و مسوح في بلاد الناس
من شوق نوله
يغزل قوله
ويغني مرفوع الراس
بلدي يا نبع النور سلسال
يهدى الفكره
للأجيال
بلدي يا لقمة عيش
يا حلال
ع الأكاله
و ع الأكال
يام النيل
سايل مواويل
كل مغني وله موال
وانا أرغولي لما يمول
سوى في الآخر
سوى في الأول
مش ح يغني إلا يا مصر
يا ركوبة ركاب النصر
سرقوكي سكان القصر
والضابط
عبد المأمور
دور يا كلام
على كيفك دور
القاهرة / 1969م
ليست هناك تعليقات:
إرسال تعليق